ᐃᒥᐊᓗᖕᒧᑦ ᑐᖁᓐᓇᖅᑐᖃᕐᓂᖅ
ᑭᓇᑐᐃᓐᓇᖅ ᐃᒥᐊᓗᖕᒥ ᐃᒥᓗᐊᖅᑎᓪᓗᒍ ᐊᒻᒪᓗ ᓇᓗᓕᖅᓯᒪᓕᕐᓗᓂ ᐅᖃᓪᓚᒍᓐᓇᙱᓪᓗᓂᓘᓐᓃᑦ, ᐋᖓᔮᕐᓂᐅᑉ ᐅᖓᑖᓅᖅᐳᑦ ᐊᒻᒪᓗ ᐋᓐᓂᐊᕈᓐᓇᕐᓗᓂ ᐃᒥᐊᓗᖕᒧᑦ ᑐᖁᓐᓇᖅᑐᖃᕐᓂᕐᒥᑦ. ᐃᒥᐊᓗᖕᒧᑦ ᑐᖁᓐᓇᖅᑐᖃᕐᓂᖅ ᑲᑉᐱᐊᓇᖅᑑᕗᖅ ᐊᒻᒪᓗ ᑐᖁᔾᔪᑕᐅᑐᐃᓐᓇᕆᐊᖃᖅᖢᓂ ᐱᑎᑕᐅᔪᒥᒃ ᐃᒥᐊᓗᖕᒥ ᐃᒥᓗᐊᕐᓂᐅᔪᒧᑦ ᐅᕝᕙᓘᓐᓃᑦ ᓱᒃᑲᔪᒥᒃ ᐃᒥᐊᓗᖃᑦᑕᕐᓂᕐᒧᑦ. ᐃᒥᐊᓗᖕᒥ ᐃᒥᓗᐊᕐᓂᖅ ᐊᒃᑐᐃᓂᖃᕈᓐᓇᖅᐳᖅ ᐊᓂᖅᑎᕆᓂᕐᓂᑦ, ᐆᒻᒪᑎᕕᑦ ᓱᒃᑲᓂᖓᓂ ᐊᒻᒪᓗ ᑎᒥᕕᑦ ᐆᓇᕐᓂᖓᓂ, ᐊᒻᒪᓗ ᑐᕌᖅᑎᑦᑎᔪᓐᓇᖅᐳᖅ ᐃᖅᑯᒻᒪᕈᓐᓇᐃᓪᓕᓂᕐᒧᑦ ᑐᖁᓂᕐᒧᓪᓘᓐᓃᑦ. ᐱᑎᑦᑎᔪᓐᓇᕆᕗᖅ ᐃᓅᓯᓕᒫᒧᑦ ᖃᕋᓴᕐᒥᒃ ᓱᔪᐃᓂᐅᔪᒥᒃ.
ᐃᒥᕐᔪᐊᕐᓂᖃᖅᑎᓪᓗᒍ ᐅᕝᔭᓘᓐᓃᑦ ᓱᒃᑲᔪᒥᒃ ᐃᒥᐊᓗᖃᑦᑕᕐᓂᕐᒥᑦ, ᐊᓕᐊᓇᐃᖅᑲᐅᒐᓗᐊᖅᑐᖅ ᐅᓐᓄᖕᒥ ᓴᖑᓴᕋᐃᑦᑐᓐᓇᖅᐳᖅ ᐊᑦᑕᓇᖅᑐᒦᓐᓂᕐᒥᑦ. ᐊᑕᐅᓯᕐᒥ ᒥᓂᑦᒥᒃ ᐱᖃᓐᓇᕆᔭᐃᑦ ᐃᒡᓚᖅᖢᓂ ᐊᒻᒪᓗ ᐊᓕᐊᓇᐃᒍᓱᖕᓂᖃᖅᖢᓂ ᐊᒻᒪᓗ ᒪᓕᒃᑐᒥᒃ ᐱᖃᓐᓇᕆᔭᐃᑦ ᐅᖃᐅᓯᖓᓐᓂ ᐅᖃᕈᓐᓇᑦᑎᐊᕈᓐᓃᖅᖢᓂ, ᒥᕆᐊᖅᓴᖅᖢᓂ, ᐊᓯᐅᔨᓪᓗᓂ ᐊᐅᓚᑦᑎᔪᓐᓇᕐᓂᖓᓂ ᐊᒻᒪᓗ ᖃᐅᔨᒪᔪᓐᓃᖅᖢᓂ. ᑕᐃᑲᓂ ᐃᓄᒃ ᐃᓄᑑᑎᑕᐅᓪᓗᖓᙱᓚᖅ “ᐋᖓᔮᕈᓐᓃᖅᓯᖅᑕᐅᓂᖓᓄᑦ ᓯᓂᒡᓗᓂ,” ᖃᓄᐃᓐᓂᐅᔪᖅ ᑐᖁᔾᔪᑕᐅᔪᓐᓇᕐᒪᑦ.
ᓇᓗᓇᐃᖅᓯᔾᔪᑕᐅᔪᑦ ᐃᒥᐊᓗᖕᒧᑦ ᑐᖁᓐᓇᖅᑐᖃᕐᓂᕐᒥᑦ:
- ᓇᓗᓕᖅᓯᒪᓂᕐᒥᑦ ᐅᕝᕙᓘᓐᓃᑦ ᓇᒦᓐᓂᖓᓂ ᓇᓗᓕᖅᓯᒪᓂᖅ
- ᖃᐅᔨᒪᔪᓐᓃᕐᓗᓂ ᐅᐃᕐᙵᕐᓗᓂᓘᓐᓃᑦ
- ᒥᕆᐊᖅᓴᕐᔪᐊᕐᓗᓂ
- ᒥᕆᐊᕐᓗᓂ ᖃᐅᔨᒪᔪᓐᓃᖅᓯᒪᑎᓪᓗᒍ
- ᓱᒃᑲᐃᑦᑐᒥᒃ ᐊᓂᖅᑎᕆᑦᐊᙱᓐᓂᕐᒥᓪᓘᓐᓃᑦ
- ᖀᖅᓱᕐᓗᓂ
- ᑐᖑᔪᕈᔪᒡᓗᓂ ᖃᐅᓪᓗᖅᓯᓯᒪᓗᓂᓘᓐᓃᑦ, ᐅᕕᓂᖓ ᐃᒃᑮᖑᓗᓂ ᐊᒻᒪ ᒪᓴᕈᔫᓗᓂ
- ᓱᒃᑲᐃᒡᓕᒋᐊᖅᑐᒥᒃ ᐆᒻᒪᑎᖓᑕ ᐃᖏᕐᕋᓂᖓᓂ
- ᐊᑦᑎᒃᑐᒥᒃ ᑎᒥᖓᑕ ᓂᒡᓚᓱᖕᓂᖓᓂ
ᐃᓱᒪᒍᕕᑦ ᑭᓇᑐᐃᓐᓇᖅ ᐃᒥᐊᓗᖕᒧᑦ ᑐᖁᓐᓇᖅᑐᖃᕐᓂᕐᒥᑦ, ᐃᑲᔪᖅᑕᐅᔪᒪᑲᐅᑎᒋᑦ ᐃᕐᙲᓐᓇᑲᐅᑎᒋ ᐅᖃᓗᒡᕕᒋᓗᒋᑦ ᐋᓐᓂᐊᕕᒃ/ᐃᓗᐊᖅᓴᐃᔨ ᐃᖅᑲᓇᐃᔭᖅᑐᒧᑦ, ᐋᓐᓂᐊᕕᓕᐊᕈᑎᓗᒋᓪᓘᓐᓃᑦ.
ᐃᑲᔪᕈᑎᒃᓴᑦ ᑭᓇᑐᐃᓐᓇᖅ ᐋᖓᔮᕐᔪᐊᕈᓂ ᑭᓯᐊᓂ ᓱᓕ ᑭᐅᔪᓐᓇᕐᓗᓂ:
- ᐅᐸᒃᓯᒪᐃᓐᓇᕐᓗᒋᑦ. ᐃᓄᑑᑎᙱᓪᓗᒋᑦ ᐋᖓᔮᕈᓐᓂᖅᓰᓗᒍ ᓯᓂᒡᓗᓂ.
- ᐃᖅᑯᒪᑎᓐᓇᓱᐊᕐᓗᒋᑦ ᐊᒻᒪᓗ ᒪᑭᑕᓗᓂ ᐃᒃᓯᕚᖅᑎᓪᓗᒍ.
- ᐃᒥᑐᐃᓐᓇᒥᒃ ᑐᓂᓗᒋᑦ, ᐃᒥᕈᓐᓇᕈᓂᐅᒃ. ᐊᓯᐊᓂᒃ ᐃᒥᖅᑎᑦᑕᐃᓕᒃᑭᑦ ᓲᕐᓗ ᑳᐱᒥᒃ, ᑎᒥᖓᓐᓂ ᐃᑦᑎᑭᓗᐊᖅᑎᑦᑎᓇᔭᖅᑐᒥᒃ ᐊᒻᒪᓗ ᐋᖓᔮᕈᓐᓃᖅᑎᑦᑎᔾᔮᙱᖦᖢᓂ.
- ᒥᕆᐊᖅᑎᓐᓇᓱᐊᖅᑕᐃᓕᓗᒍ. ᐄᔮᖓ ᐱᓕᕆᔪᓐᓇᑦᑎᐊᙱᑐᐃᓐᓇᕆᐊᖃᕐᒪᑦ ᐊᒻᒪᓗ ᑐᐱᑦᑐᓐᓇᖅᖢᑎᒃ.
- ᐅᐸᒃᓯᒪᐃᓐᓇᕐᓗᒍ ᑭᓇᑐᐃᓐᓇᖅ ᒥᕆᐊᖅᓴᖅᑐᒥᒃ ᖃᐅᔨᓴᕐᓂᕐᒧᑦ ᑐᐱᔾᔮᙱᒃᑲᓗᐊᕐᓂᖏᓐᓂ ᖃᐅᔨᒪᔪᓐᓃᕐᓗᑎᒡᓘᓐᓃᑦ.
- ᐅᖅᑰᑎᒋᐊᕐᓗᒋᑦ, ᐃᓯᖅᑎᓪᓗᒋᑦ ᐃᒡᓗᒧᑦ, ᕿᐱᒃᓯᒪᑎᓪᓗᒋᑦ. ᐃᒥᐊᓗᒃ ᐊᑦᑎᒃᓯᒋᐊᓲᖑᕗᖅ ᑎᒥᐅᑉ ᐆᓇᕐᓂᖓᓂ ᑐᕌᖅᑎᑦᑎᔪᓐᓇᖅᑐᒥᒃ ᓂᒡᓕᓗᐊᖅᑐᒧᑦ ᑎᒥᒥᑦ.
- ᖃᐅᔨᓴᕐᓗᒋᑦ ᓱᙴᔭᕐᒪᖔᑕ, ᕿᓕᖅᓯᒪᓂᖃᕈᓂ ᐊᓯᖏᓐᓂᓪᓗ ᐋᓐᓂᕐᓂᐅᔪᓂᒃ. ᐱᔭᕆᐊᖃᖅᐸᑦ, ᐋᓐᓂᐊᕕᓕᐊᕈᑎᓗᒋᑦ.
- ᐃᒥᐊᓗᖕᒥ ᐃᒥᖅᑕᐃᓕᒪᑎᒃᑲᓐᓂᕐᓗᒋᑦ.
ᖃᐅᔨᒪᔪᓐᓃᖅᓯᒪᒍᑎᒃ ᐊᒻᒪᓗ ᑐᐹᖅᑕᐅᔪᓐᓇᙱᓪᓗᑎᒃ ᐅᕝᕙᓘᓐᓃᑦ ᓇᓪᓚᕈᒪᓗᑎᒃ, ᓴᓂᕋᖓᓄᐊᖅᑎᓪᓗᒋᑦ ᓄᖅᑲᖅᑎᑦᑎᓂᕐᒧᑦ ᑐᐱᑦᑐᓐᓇᕐᓂᖓᓂ ᒥᕆᐊᖓᓐᓄᑦ. ᑕᑯᒍᒃ ᐊᔾᔨᙳᐊᖅ ᐊᑖᓂ:
ᐃᑲᔪᖅᓯᖅᑕᐅᔭᕆᐊᖃᖅᐲᑦ?
ᑲᑉᐱᐊᓱᒃᑯᕕᑦ ᐊᑦᑕᓇᔾᔭᐃᖅᓯᒪᓂᕐᒧᑦ ᑭᓇᑐᐃᓐᓇᒥᒃ ᐃᒥᓗᐊᒃᑲᐅᔪᒧᑦ, ᑕᒪᓐᓇ ᓇᓗᓇᐃᒃᑯᑕᐅᑐᐃᓐᓇᕆᐊᖃᖅᐳᖅ ᐃᒥᐊᓗᖕᓂᕐᒧᑦ ᐊᑲᐅᙱᓕᐅᕈᑕᐅᓂᖓᓂ. ᐃᓄᒃ ᐊᑲᐅᓂᖅᓴᐅᓕᖅᐸᑦ, ᐃᑲᔪᕐᓂᖃᕈᓐᓇᑐᐃᓐᓇᕆᐊᖃᖅᐳᖅ ᐃᖏᖃᑎᒋᓗᒋᑦ ᐊᒻᒪᓗ ᐅᖃᖃᑎᒋᓗᒋᑦ ᐃᑲᔪᖅᓯᖅᑕᐅᓂᖏᓐᓂ.