ᐱᕋᔭᖕᓂᐅᔪᑦ ᐊᒻᒪ ᐋᓐᓂᖅᓯᕆᓂᖅ
ᓴᙱᔪᒥᒃ ᑕᑯᒃᓴᐅᓂᖃᖅᐳᖅ ᐃᒥᐊᓗᓗᐊᖃᑦᑕᕐᓂᕐᒧᑦ ᓄᓇᕗᒻᒥ ᑲᑎᙵᓂᖃᖅᐳᖅ ᐊᖏᒡᓕᒋᐊᖅᑐᒥ ᐱᕋᔭᖕᓂᐅᔪᒥᑦ ᐊᒻᒪ ᐋᓐᓂᖅᓯᕆᓂᐅᔪᒥᒃ ᐃᓕᖅᑯᓯᐅᔪᓂᑦ. ᐃᒥᐊᓗᕐᔪᐊᖃᑦᑕᕐᓂᖅ ᐃᓕᓯᔪᓐᓇᕆᕗᑦ ᐃᓄᖕᓂ ᐅᓗᕆᐊᓇᕐᓂᖅᓴᐅᔪᒥᒃ ᐱᕋᔭᒃᑕᐅᓂᖏᓐᓂ ᐋᓐᓂᖅᓯᕆᔭᐅᓂᕐᓄᑦ ᐱᕋᔭᖕᓂᐅᔪᓂᑦ.
ᐸᓖᓯᐅᔪᑦ ᐅᖃᖅᓯᒪᕗᑦ 90−ᒥ 95 ᐳᓴᓐᑎᖓᓂ ᖃᐃᖁᔭᐅᓂᐅᔪᓂᑦ ᐃᓚᖃᓲᖑᕗᑦ ᐃᒥᐊᓗᖕᒧᑦ. ᓱᓕᒃᑲᓐᓂᖅ, ᓇᓚᐅᑦᑖᕆᔭᐅᔪᒥᒃ 90−ᒥ 95 ᐳᓇᓐᑎᖓᓄᑦ ᐃᓄᖕᓂ ᑎᒍᔭᐅᓯᒪᔪᓄᑦ ᕿᑭᖅᑖᓗᖕᒥ ᐃᑲᔪᖅᑕᐅᕕᖓᓂ ᐋᖓᔮᓚᐅᖅᐳᑦ ᐱᕋᔭᖕᓂᕆᓚᐅᖅᑕᖓᓂ, ᐃᓚᖃᖅᖢᓂ ᖁᓄᔪᓐᓂᐊᕐᓂᕐᒥᑦ ᐊᒻᒪᓗ ᐊᓯᖏᓐᓂ ᐋᓐᓂᖅᓯᕆᓂᕐᓄᑦ ᐊᒻᒪᓗ ᐋᓐᓂᖅᓯᕆᓂᐅᙱᑦᑐᓄᑦ ᐃᓕᖅᑯᓯᖃᕐᓂᖏᓐᓄᑦ. ᐊᐃᑦᑖᖑᒐᓗᐊᖅ, ᒪᒃᑯᒃᑐᓄᑦ ᒪᓕᒐᓕᕆᔨᐅᔪᑦ ᐅᖃᓚᐅᖅᐳᑦ ᑕᒪᒃᑭᑲᓴᑦ ᒪᒃᑯᒃᑐᑦ ᒪᒃᑯᒃᑐᓄᑦ ᒪᓕᒐᓕᕆᓂᐅᔪᒥᒃ ᐱᓕᕆᔾᔪᓯᒃᑰᖅᑐᓄᑦ ᓄᓇᕗᒻᒥ ᐊᑐᓲᖑᓂᖏᓐᓂ ᐃᒥᐊᓗᖕᒥ ᐊᒻᒪ ᓱᐴᖅᑐᒐᕐᓂᑦ.
ᐊᒃᑐᐃᓂᐅᔪᑦ ᐃᒥᐊᓗᕐᔪᐊᖃᑦᑕᕐᓂᐅᔪᓂᒃ ᓄᓇᓕᖕᓂ ᐃᓚᖃᖅᐳᑦ:
- ᑎᒥᒃᑯᑦ ᐋᓐᓂᖅᓯᕆᓂᐅᔪᓂᒃ, ᖁᓄᔪᕐᓂᐊᕐᓂᕐᒥᑦ, ᐅᓇᑕᖅᑕᐅᓪᓗᑎᒃ ᑯᔭᒃᑕᐅᓂᕐᓂᑦ
- ᐊᐃᑉᐸᕆᔭᒥᒃ ᐋᓐᓂᖅᓯᕆᓂᐅᔪᓂᒃ
- ᕿᑐᙵᒥᓂᑦ ᐋᓐᓂᖅᓯᕆᓂᕐᒧᑦ ᐊᒻᒪᓗ ᐃᒃᓯᖕᓇᖅᑕᐅᓂᖏᓐᓂ
- ᐃᓄᑐᖃᕐᓂ ᐋᓐᓂᖅᓯᕆᓂᐅᔪᓂᒃ
- ᐋᖓᔮᕐᓗᓂ ᐊᖁᓐᓂᖓᓂ
ᐊᕐᓇᐃᑦ ᐱᓗᐊᖅᑐᒥ ᐅᓗᕆᐊᓇᕐᓂᖅᓴᒦᑉᐳᑦ ᐊᑐᕐᓂᕐᒥᑦ ᐋᓐᓂᖅᓯᕆᔭᐅᓂᕐᒥ ᐊᒻᒪ ᐊᖏᕐᓇᑎᒃ ᑯᔭᖕᓂᐅᔪᓂᑦ. ᐃᒥᐊᓗᓗᐊᖃᑦᑕᕐᓂᖅ ᑕᒪᒃᑭᓄᑦ ᐊᖑᑎᓄᑦ ᐊᒻᒪ ᐊᕐᓇᕐᓄᑦ ᐊᒃᑐᐃᓲᖑᕗᖅ ᐱᔪᓐᓇᕐᓂᕐᒥ ᐃᓱᒪᓕᐅᕆᑦᑎᐊᕈᓐᓇᕐᓂᖏᓐᓂ ᐊᒻᒪᓗ ᐱᔪᓐᓇᕐᓂᕐᒥ ᖃᐅᔨᒪᓂᖓᓂ ᑭᒡᓕᐅᔪᒥ ᐅᓗᕆᐊᓇᕐᓂᐅᔪᓂ ᖃᓄᐃᑦᑐᑐᐃᓐᓇᑦᑎᐊᕐᒥ ᖃᓄᐃᓐᓂᐅᔪᓂᑦ. ᐊᖏᒡᓕᒋᐊᖅᑎᑦᑎᔪᓐᓇᖅᐳᖅ ᐊᕐᓇᐅᑉ ᐱᔭᐅᓴᕋᐃᓐᓂᖓᓂ ᓵᓚᒋᔭᐅᓂᕐᒧᑦ, ᐋᓐᓂᖅᓯᖅᑕᐅᓂᕐᒧᑦ ᐊᒻᒪ ᖁᓄᔪᓐᓂᐊᕐᓂᕐᒧᑦ.
ᑐᑰᑦᑎᓂᐅᔪᑦ ᐊᒻᒪᓗ ᐱᔮᕆᓇᑎᒃ ᑐᖁᓂᐅᔪᑦ
ᐃᒥᐊᓗᖕᒥ ᐊᑐᕐᓂᖅ ᑐᕌᖅᑎᑦᑎᓂᖃᕈᓐᓇᖅᐳᖅ ᑐᖂᑦᑎᓂᐅᔪᒥᒃ ᐃᓄᖕᒥᑦ ᐃᒥᖅᑐᒧᑦ, ᑭᓯᐊᓂᑦᑕᐅᖅ ᐃᓕᓯᓗᓂ ᐊᓯᖏᓐᓂ ᐃᓄᖕᓂ ᐃᓅᓯᖓᓐᓂ ᐅᓗᕆᐊᓇᕈᑕᐅᓂᖓᓂ. ᐅᓂᒃᑳᓕᐊᑦ ᓄᓇᕗᒻᒥ ᑕᑯᒃᓴᐅᑎᑦᑎᕗᑦ:
- 23 ᐳᓴᓐᑎᒥᒃ ᑕᒪᒃᑭᓂᒃ ᐱᕐᕈᓗᐊᕿᓂᐅᔪᓄᑦ ᑐᖁᓂᐅᔪᑦ ᐃᓚᖃᖅᐳᑦ ᐃᒥᐊᓗᖕᒥᑦ
- 30 ᐳᓴᓐᑎᒥᒃ ᑕᒪᒃᑭᓂᒃ ᑐᖂᑦᑎᓂᐅᔪᓂᑦ ᐃᓚᖃᖅᐳᑦ ᐃᒥᐊᓗᖕᒥᑦ ᓱᐴᖅᑐᒐᕐᓂᓪᓘᓐᓃᑦ
- ᐃᒥᐊᓗᒃ ᓯᕗᓪᓕᖅᐹᖑᓪᓗᓂ ᐱᔾᔪᑕᐅᕗᖅ ᐅᒥᐊᖅᑐᕐᓂᒃᑯᑦ ᐱᕐᕈᓗᐊᕿᓂᐅᔪᓂᒃ ᐊᒻᒪᓗ ᑭᕕᓂᕐᓄᑦ
ᐱᕐᕈᓗᐊᕿᓂᕐᓄᑦ ᑐᖁᓂᐅᔪᑦ ᑐᕌᖓᓂᖃᖅᑐᒥᒃ ᐱᔾᔪᑕᐅᕗᑦ ᑐᖁᓂᐅᔪᓄᑦ ᓄᓇᕗᒻᒥᐅᓂ ᐅᑭᐅᓕᖕᓄᑦ 25 ᑐᖔᓄᑦ, ᐊᒻᒪᓗ ᓇᑉᐸᓪᓗᐊᖓᑕ ᐅᖓᑖᓄᑦ ᓄᓇᕗᒻᒥ ᐃᓄᒋᐊᖕᓂᐅᔪᓄᑦ ᐃᓗᐊᓃᑉᐳᑦ ᐅᕙᓂ ᐅᑭᐅᖃᕐᓂᐅᔪᓄᑦ. ᐊᐃᑦᑖᖑᒐᓗᐊᖅ, ᐊᒥᓱᐃᑦ ᑐᖁᓂᐅᔪᑦ ᑕᐃᒪᐃᑎᑕᐅᙱᑦᑐᓐᓇᕋᓗᐊᖅᐳᑦ.