ᐊᑦᑕᓇᖅᑐᒥ ᐊᐃᑉᐸᕇᖃᑦᑕᕐᓂᕐᒧᑦ ᐃᓕᖅᑯᓯᐅᔪᑦ
ᐃᒥᐊᓗᒃ ᑐᕌᖅᑎᑦᑎᔪᓐᓇᖅᐳᖅ ᐅᓗᕆᐊᓇᖅᑐᒧᑦ ᐊᒻᒪᓗ ᐊᑦᑕᓇᖅᑐᒥ ᐊᐃᑉᐸᕇᖃᑦᑕᕐᓂᕐᒧᑦ ᐃᓕᖅᑯᓯᐅᔪᓄᑦ. ᐃᓄᐃᑦ ᐃᒥᓗᐊᕌᖓᒥᒃ, ᐊᒃᑐᐃᓂᖃᕈᓐᓇᕐᒪᑦ ᐃᓱᒪᓕᐅᕆᓂᖓᓐᓂ, ᓲᕐᓗ ᐊᑐᙱᓪᓗᑎᒃ ᐅᓲᑉ ᐴᖓᓂ. ᐅᓗᕆᐊᓇᕐᓂᖅᓴᒧᐊᖅᑎᑦᑎᓲᖑᕗᖅ ᐊᐃᑉᐸᕇᖕᓂᒃᑯᑦ ᐊᐃᑦᑐᖅᑕᐅᔪᒥ ᖁᐱᕐᕆᓐᓂᕐᓄᑦ ᐊᒻᒪᓗ ᓯᖓᐃᓕᕐᓂᕐᒧᑦ ᐸᕐᓇᒃᓯᒪᓇᑎᒃ.
ᓴᐳᔾᔨᓯᒪᙱᑦᑐᒥ ᑯᔭᖕᓂᒃᑯᑦ ᐊᐃᑦᑐᖅᑕᐅᔪᒥ ᖁᐱᕐᕆᓐᓂᕐᓄᑦ (STI) ᓲᕐᓗ:
- ᖁᐱᕐᕈᐊᕐᔪᐃᑦ ᒪᒥᓴᕋᑦᓴᐃᑦ ᑯᔭᖕᓂᒃᑯᑦ ᑕᐅᖅᓰᔭᐅᔪᓄᑦ ᖁᐱᕐᕆᓐᓂᕐᓄᑦ (ᖁᐱᕐᕆᓯᒪᓂᖅ, ᓴᙱᓂᖅᓴᖅ ᖁᐱᕐᕆᓯᒪᓂᑦ ᐊᔾᔨᒌᙱᑦᑐᓂᒃ)
- ᖁᐱᕐᕈᐃᑦ ᐊᐃᑦᑐᖅᑕᐅᓂᒃᑯᑦ ᑯᔭᖕᓂᒃᑯᑦ ᑕᐅᖅᓰᔭᐅᔪᓄᑦ ᖁᐱᕐᕆᓐᓂᕐᓄᑦ (ᐊᓴᐱᑖᕐᓂᕐᒧᑦ, ᐊᕐᓇᓄᑦ ᖁᐱᕐᕆᓯᒪᓂᐅᔪᒥᒃ, ᑎᖑᒡᓗᖕᓇᖅᑐᖅ ᑎᒥᐅᑉ ᐃᑎᖓᒍᑦ ᐊᐅᒃᑯᓪᓗ, ᐃᒻᒥᒎᓪᓛᔪᒥᒃ ᐊᖕᒪᓪᓛᔪᖅ)
- ᐃᓄᖕᓂᙶᖅᑐᓂᒃ ᑯᔭᖕᓂᒃᑯᑦ ᑕᐅᖅᓰᔭᐅᔪᓄᑦ ᖁᐱᕐᕆᓐᓂᕐᓄᑦ (ᖁᐱᕐᕆᓯᒪᓂᖅ, ᑯᒥᓛᑦ, ᑎᖏᖕᓂ ᑯᒻᒪᒃᓯᒪᓂᖅ)
ᓄᓇᕗᑦ ᒫᓐᓇᐅᔪᒥ ᓴᙱᔪᐊᓗᖕᒥ ᖁᐱᕐᕆᓂᖃᓕᖅᐳᖅ ᐅᓄᕐᓂᖅᓴᐅᔪᒥᑦ 15−ᖏᖅᓱᖅᑐᒥᒃ ᑲᓇᑕᒥ ᐅᓄᕐᓂᖓᓂ. ᐅᓂᒃᑳᕆᔭᐅᓚᐅᖅᐳᖅ 2013−ᒥ ᐱᖓᓱᓂ ᑎᓴᒪᓄᑦ ᓱᙱᔪᐊᓗᖕᒥ ᖁᐱᕐᕆᓯᒪᓂᐅᔪᑦ ᓄᓇᕗᒻᒥ ᐃᓚᖃᓚᐅᖅᐳᑦ ᐃᒥᐊᓗᖕᒥ ᐊᒻᒪᓗ/ᐅᕝᕙᓘᓐᓃᑦ ᓱᐴᖅᑐᕋᕐᓂ ᐊᑐᕐᓂᕐᒧᑦ. ᖄᒃᑲᓐᓂᐊᒍᑦ, ᐃᒥᖅᑎᕐᔪᐊᖑᔪᑦ ᐱᔪᒥᓇᕐᓂᖅᓴᐅᕗᑦ ᐊᓴᐱᒥᒃ. ᐊᑐᖅᐸᖕᓂᖅ ᓴᐳᔾᔨᓯᒪᑦᑎᐊᖅᑐᒥᒃ ᐊᐃᑉᐸᖃᕐᕐᒥᑦ ᐱᒻᒪᕆᐅᖃᑕᐅᕗᖅ ᐱᑎᑦᑎᑦᑕᐃᓕᒪᓂᕐᒧᑦ ᐊᐃᑦᑐᖅᑕᐅᓂᖓᓂ ᓴᙱᔪᐊᓗᖕᒥ ᖁᐱᕐᕆᓯᒪᓂᐅᔪᒥᒃ ᐊᒻᒪᓗ ᐊᓯᖏᓐᓂ ᑯᔭᖕᓂᒃᑯᑦ ᐊᐃᑦᑐᖅᑕᐅᔪᓄᑦ ᐋᓐᓂᐊᕐᓇᓂᑦ.
ᓱᓕᒃᑲᓐᓂᖅ, ᑯᔭᖕᓂᖅ ᐃᓚᐅᑎᑦᑎᔪᓐᓇᖅᐳᖅ ᖁᑦᑎᒃᑐᒥ ᑭᒡᓕᐅᔪᒥ ᐅᓗᕆᐊᓇᕐᓂᐅᔪᒥ ᐃᒥᐊᓗᕐᔪᐊᖃᑦᑕᕐᓂᐅᔪᒥ ᐃᓚᐅᑎᓪᓗᒍ. ᐊᖏᕐᓂᖅ ᖃᓄᑐᐃᓐᓇᓄᑦ ᑯᔭᖕᓂᕐᒧᑦ ᖃᓄᐃᓕᐅᕐᓂᐅᔪᓂ ᐃᓱᒪᖅᓲᑕᐅᓗᓂ ᑐᓂᔭᐅᔭᕆᐊᖃᖅᐳᑦ ᐊᒻᒪᓗ ᐊᖏᕐᓂᖅ ᑐᓂᔭᐅᔪᓐᓇᙱᓚᖅ ᑭᓇᑐᐃᓐᓇᒧᑦ ᐋᖓᔮᖅᑐᒧᑦ ᖃᐅᔨᒪᙱᑦᑐᒧᓪᓘᓐᓃᑦ. ᐃᓄᖕᒥ ᐅᓇᑕᕐᓗᓂ ᐱᔭᐅᔪᒪᙱᑦᑐᒥ ᑯᔭᖕᓂᐅᔪᒥ ᐊᓯᖓᓐᓄᑦ ᐃᓄᖕᒧᑦ ᐊᖏᓚᐅᕐᓇᑎᒃ, ᐅᓇᑕᕐᓂᒃᑯᑦ ᑲᑉᐱᐊᓵᕆᓂᒃᑯᓪᓘᓐᓃᑦ, ᑕᒪᓐᓇ ᑯᔭᖕᓂᒃᑯᑦ ᐋᓐᓂᖅᓯᕆᓂᐅᕗᖅ ᐊᒻᒪᓗ ᐱᕋᔭᖕᓂᐅᕗᖅ.
ᖃᐅᔨᒋᐊᒃᑲᓐᓂᕐᓂᕐᒧᑦ ᐅᖃᐅᓯᒃᓴᓂᒃ, ᐅᐸᒍᒃ ᓄᓇᓕᖕᓂ ᐋᓐᓂᐊᕕᑦ ᐅᕝᕙᓘᓐᓃᑦ ᐅᐸᒡᓗᒍ www.irespectmyself.ca.