ᐅᕙᑦᑎᓐᓂ ᒥᒃᓵᓄᑦ
ᐅᔾᔨᖅᓱᖅᑕ ᖁᕝᕙᖅᓴᐃᕗᖅ ᑲᒪᒋᔭᖃᑦᑎᐊᖅᑐᒥᒃ ᐊᑐᕐᓂᕐᒥᑦ ᐃᒥᐊᓗᖕᒥ ᓄᓇᕗᒻᒥ. ᒥᐊᓂᕆᔭᐅᕗᖅ ᐅᒃᐱᕈᓱᖕᓂᐅᔪᒥᒃ ᓄᓇᓕᖕᓂ ᐱᔪᓐᓇᖅᓯᕙᓪᓕᐊᓂᖏᓐᓂ, ᐊᒻᒪᓗ ᑕᑯᓪᓗᑎᒃ ᓄᓇᓕᖕᓂ ᐱᒻᒪᕆᐅᓂᖏᓐᓂ ᐃᑲᔪᕈᑎᒃᓴᐅᓂᖏᓐᓂ ᐊᒻᒪᓗ ᑐᓂᓯᔨᐅᓂᖏᓐᓂ ᒥᒃᖠᒋᐊᖅᑎᑦᑎᓂᐅᓂᖏᓐᓂ ᐊᒃᑐᕐᓂᕐᓗᒃᑎᑦᑎᓂᐅᔪᒥᒃ ᐃᒥᐊᓗᖕᒥ ᐊᑐᕐᓂᕐᒧᑦ ᐃᓄᑐᐃᓐᓇᓄᑦ, ᐃᓚᒌᓄᑦ ᐊᒻᒪᓗ ᓄᓇᓕᖕᓄᑦ.
ᐅᖃᐅᓯᒃᓴᐃᑦ, ᐱᓕᕆᔾᔪᑎᑦ ᐊᒻᒪ ᐃᑲᔪᕈᑎᒃᓴᑦ ᐊᑐᐃᓐᓇᐅᓂᐊᖅᐳᑦ ᑎᓴᒪᓄᑦ ᐱᒻᒪᕆᐅᔪᓂ ᑲᑎᙵᓂᐅᔪᓄᑦ:
- ᑕᒪᐃᑎᒍᑦ ᐃᓂᒋᐊᖕᓂᐅᔪᑦ
- ᐃᒥᐊᓗᓕᕆᔩᑦ ᑲᑎᒪᔨᕋᓛᑦ
- ᐃᑲᔪᖅᑐᑦ ᐱᓕᕆᐊᖑᔪᓂᑦ
- ᒪᒃᑯᒃᑐᑦ ᐊᒻᒪ ᒪᒃᑯᒃᑐᑦ ᐃᓐᓇᐃᑦ
ᐅᔾᔨᖅᓱᖅᑕ ᐱᕙᓪᓕᐊᑎᑕᐅᓚᐅᖅᐳᖅ ᐊᒻᒪᓗ ᐊᑐᓕᖅᑎᑕᐅᓪᓗᓂ ᐃᑲᔪᖅᑕᐅᓪᓗᑎᒃ ᐱᓕᕆᕕᐅᔪᓂ ᑮᓇᐅᔭᓕᕆᔨᒃᑯᓐᓂ, ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ, ᐃᓕᓐᓂᐊᕐᓂᓕᕆᔨᒃᑯᓐᓂ ᐊᒻᒪᓗ ᐃᓄᓕᕆᔨᒃᑯᓐᓂ.
ᖃᓄᐃᑉᐸᓚᐅᕐᓂᖏᓐᓂ
2012-ᒥ, ᓄᓇᕗᒻᒥ ᐃᒥᐊᓗᖕᒧᑦ ᒪᓕᒐᖓᑕ ᕿᒥᕐᕈᔭᐅᓂᖓᓂ ᐱᓕᕆᔨᐅᓂᐊᖅᑐᓂᒃ ᓴᖅᑭᑎᑦᑎᓚᐅᖅᐳᑦ ᓄᑖᒥᒃ ᑐᕌᒐᖃᕆᐊᖃᓕᕐᓂᕐᒥᑦ: ᓄᖅᑲᖅᑎᑦᑎᓂᖅ ᐊᒃᑐᕐᓂᕐᓗᒃᑎᑦᑎᓂᐅᔪᒥᒃ, ᐅᓂᒃᑳᓕᐊᖑᔪᖅ ᐅᓂᒃᑳᕆᔪᒥᒃ ᐅᖓᓯᒃᑐᒨᖓᔪᒥᒃ ᐅᖃᖃᑎᖃᕐᓂᐅᔪᒥᒃ ᐱᓕᕆᔾᔪᓯᐅᔪᒥᒃ ᐃᓚᐅᑎᑦᑎᔪᒥᒃ ᑕᒪᒃᑭᓂᒃ ᓄᓇᕗᒻᒥ ᓄᓇᓕᐅᔪᓂᑦ. ᑐᕌᒐᓪᓗᐊᑕᐅᔪᖅ ᐅᓂᒃᑳᓕᐊᒥᒃ ᓴᓇᓂᕐᒧᑦ ᐊᑐᓕᖁᔭᐅᔪᓂᒃ ᐱᔾᔪᑎᖃᖅᑐᓄᑦ ᐃᒥᐊᓗᖕᒧᑦ ᒪᓕᒐᖓᓐᓄᑦ, ᐃᓚᖃᖅᖢᓂ ᐱᒻᒪᕆᐅᔪᓂ ᐊᑐᓕᖁᔭᐅᔪᓂᑦ ᒥᒃᖠᒋᐊᖅᑎᑦᑎᓂᕐᒧᑦ ᐃᒥᐊᓗᖕᒧᑦ−ᐱᔾᔪᑕᐅᔪᓄᑦ ᐊᒃᑐᕐᓂᕐᓗᒃᑎᑦᑎᓂᐅᔪᒥᒃ, ᓲᕐᓗ ᐃᓕᓐᓂᐊᖅᑎᑦᑎᓂᕐᒧᑦ ᐃᓄᓕᒫᓂᒃ ᑲᒪᒋᔭᖃᑦᑎᐊᕐᓂᐅᔪᒥᒃ ᐅᓗᕆᓇᙱᓐᓂᖅᓴᓂᒡᓘᓐᓃᑦ ᐃᒥᐊᓗᖕᒥ ᐊᑐᕐᓂᕐᒧᑦ.
ᐊᒥᓱᓂᒃ ᓯᓚᑖᒍᑦ ᐱᔾᔪᑎᑕᓕᒃ ᐃᒥᐊᓗᖕᒥ ᐊᑐᕐᓂᕐᒧᑦ ᐊᔾᔨᐅᙱᑎᑦᑎᔪᒥᒃ ᓄᓇᕗᒻᒥ ᑕᐅᑐᒃᖢᒍ ᑲᓇᑕᓕᒫᒥᒃ. ᑕᒪᒃᑯᐊ ᐃᓚᖏᑦ ᐃᓚᖃᖅᐳᑦ ᐊᔪᖅᓴᕐᓂᕐᒧᑦ, ᐊᓯᐅᔨᓂᖅ ᐃᓕᖅᑯᓯᖓᓐᓂ ᑭᓇᐅᓂᖓᓂ, ᐆᒪᓂᕐᓄᑦ ᖃᓄᐃᓕᖓᓂᐅᔪᓂᒃ, ᐃᓄᑭᑦᑑᓂᖓᓂ ᐅᖓᓯᖕᓂᐊᓗᖓᓄᑦ ᓄᓇᓕᐅᔪᓂᑦ, ᐃᖏᕐᕋᐃᓐᓇᖅᑐᓂ ᑕᐃᔅᓱᒪᓂᓂ ᐊᒻᒪ ᒫᓐᓇᐅᔪᒥ ᖃᓄᐃᓕᓂᕐᓘᑕᐅᓯᒪᓂᕆᔭᖏᓐᓂ, ᐊᒻᒪᓗ ᐱᓕᕆᔾᔪᓯᐅᔪᒥᒃ ᐊᑭᕋᖅᑐᕐᓂᕐᒥᑦ ᐊᒻᒪᓗ ᐃᓚᐃᓐᓇᖅᓯᓂᐅᔪᒥᑦ.
ᓄᖅᑲᖅᑎᑦᑎᓂᖅ ᐊᒃᑐᕐᓂᕐᓗᒃᑎᑦᑎᓂᐅᔪᒥᒃ ᓇᓗᓇᐃᖅᓯᓚᐅᖅᐳᑦ ᐃᓱᒫᓘᑎᓂᒃ ᓄᓇᓕᖕᒥᐅᑕᓂᒃ ᐃᒥᕐᔪᐊᓗᐊᖃᑦᑕᕐᓃᑦ ᐊᑐᖅᑕᐅᒐᔪᓕᕐᓂᖓᓂ ᐊᒥᓱᓗᐊᓄᑦ ᐃᓄᖕᓄᑦ ᓄᓇᕗᒻᒥ. ᓄᓇᕗᒻᒥᐅᑦ ᐅᓂᒃᑳᕆᓯᒪᕗᑦ ᐊᒥᓱᓂ ᐃᒥᐊᓗᓗᐊᖃᑦᑕᕐᓂᕐᓂ ᑕᐅᑐᒃᖢᒍ ᑲᓇᑕᓕᒫᒥᒃ, ᑐᕌᖅᓯᒪᓂᖃᖅᑐᒥ ᐃᓕᖅᑯᓯᐅᔪᒥᒃ “ᖁᑦᑎᒃᑐᒥ−ᐅᓗᕆᐊᓇᖅᑐᒦᓐᓂᖏᓐᓂ” ᐃᒥᐊᓗᖕᓂᕐᓂ, ᓲᕐᓗ ᐃᒥᕐᔪᐊᓗᐊᖃᑦᑕᕐᓂᖅ ᐊᒻᒪᓗ ᓱᒃᑲᔪᒥᒃ ᐃᒥᐊᓗᖃᑦᑕᕐᓂᖅ, ᑕᐃᒪᐃᒐᔪᒃᐳᖅ ᐃᒥᐊᓗᖕᓂᕐᒥ ᐊᑐᖅᑕᐅᕙᖕᓂᐅᓪᓗᓂ. ᐅᖃᐅᓯᐅᓂᖓᑎᒍᑦ ᓄᖅᑲᖅᑎᑦᑎᓂᖅ ᐊᒃᑐᕐᓂᕐᓗᒃᑎᑦᑎᓂᐅᔪᒥᒃ, ᑕᒪᓐᓇ ᐃᒥᐊᓗᓗᐊᖃᑦᑕᕐᓂᖅ ᐃᓕᖅᑯᓯᐅᔪᖅ ᐱᑎᑦᑎᓂᐅᒐᔪᒃᐳᖅ ᖃᔅᓯᒐᓚᖕᓂ ᐅᓄᕐᓂᐅᔪᓂᒃ ᐃᓄᑐᐃᓐᓇᓄᑦ, ᐃᓚᒌᓄᑦ ᐊᒻᒪᓗ ᐃᓅᖃᑎᒌᖕᓂᕐᒧᑦ ᐊᑲᐅᙱᓕᐅᕈᑕᐅᔪᓄᑦ. ᐊᖏᕐᕋᒥᒃ ᓂᙵᐅᑎᓂᖅ ᐱᓗᐊᖅᑐᒥᒃ ᐃᓱᒫᓘᑕᐅᖃᑕᐅᕗᖅ, ᐊᒻᒪᓗ ᑕᒪᐃᑎᒍᑦ ᐋᓐᓂᖅᓯᕆᓂᐅᔪᓂᒃ ᐱᕋᔭᖕᓂᕐᓄᑦ ᐊᒥᓲᓂᖏᑦ ᒪᕐᕈᐃᓪᓗᐊᖅᑑᕗᑦ ᑲᓇᑕᓕᒫᒥ ᑕᐃᒪᐃᒐᔪᖕᓂᖓᓂ. ᐸᓖᓯᒃᑯᑦ ᓇᓚᐅᑦᑖᕆᕗᑦ ᐃᒥᐊᓗᖕᒧᑦ ᐋᖓᔮᕐᓂᐅᔪᑦ ᐱᑎᑦᑎᕙᖕᓂᖏᓐᓂ ᑎᑭᐅᒪᔪᒧᑦ 95%−ᒥ ᖃᐃᖁᔨᓂᐅᔪᓄᑦ ᐊᒻᒪᓗ ᑎᒍᔭᐅᓂᐅᔪᓄᑦ ᓄᓇᕗᒻᒥ.
ᓄᖅᑲᖅᑎᑦᑎᓂᖅ ᐊᒃᑐᕐᓂᕐᓗᒃᑎᑦᑎᓂᐅᔪᒥᒃ ᓇᓗᓇᐃᖅᓯᓚᐅᖅᐳᑦ ᐋᓐᓂᕐᓇᕐᔪᐊᕐᓂᖓᓂ ᐊᒃᑐᐃᓂᐅᓂᖓᓂ ᐃᒥᐊᓗᖕᒥ ᐊᑐᖃᑦᑕᕐᓂᕐᒧᑦ ᐃᓚᒌᖑᔪᓄᑦ. ᐃᓄᓕᕆᔨᒃᑯᑦ ᓇᓚᐅᑦᑖᕆᕗᑦ 90%−ᓗᐊᒥᒃ ᓱᕈᓯᓄᑦ ᓴᐳᔾᔨᓯᒪᔭᕆᐊᖃᕐᓂᐅᔪᓄᑦ ᐱᔾᔪᑎᖃᖅᐸᒃᐳᑦ ᐃᒥᐊᓗᖕᒧᑦ. ᐃᒥᐊᓗᖕᒥ ᐊᑐᖃᑦᑕᕐᓂᖅ ᑲᑎᙵᓂᕆᑎᑕᐅᕙᒃᑭᕗᖅ ᓯᖓᐃᔭᐅᑎᓪᓗᒍ ᐋᖓᔮᖃᑦᑕᕐᓂᕐᒧᑦ, ᓂᑲᓪᓗᖓᓂᕐᒧᑦ ᐊᒻᒪᓗ ᐃᒻᒥᓃᕐᓂᕐᒧᑦ ᓄᓇᕗᒻᒥ.
ᐅᔾᔨᖅᓱᖅᑕ ᐅᖃᕋᓱᐊᙱᑦᑐᑦ ᐃᓄᐃᑦ ᐃᒥᐊᓗᒃᑐᕆᐊᖃᙱᓐᓂᖓᓐᓂ. ᐃᓕᓐᓂᐊᖅᑎᑦᑎᓂᐅᓂᖅᓴᐅᓂᐅᕗᖅ ᓄᓇᕗᒻᒥᐅᓂ ᐊᑦᑕᓇᔾᔭᐃᖅᓯᒪᓂᕐᒥᑦ ᐊᒻᒪᓗ ᐃᓅᖃᑎᒌᖕᓂᒃᑯᑦ ᑲᒪᑦᑎᐊᕐᓂᐅᔪᒥᑦ ᐃᒥᐊᓗᖕᒥ ᐃᒥᕐᓂᕐᒧᑦ ᒥᒃᖠᒋᐊᖅᑎᑦᑎᓂᐊᖅᑐᒥᒃ ᐊᑐᕐᓂᕐᓗᒃᑎᑦᑎᓂᐅᔪᒥᒃ ᑕᐃᒃᑯᓄᖓ ᐃᒥᕈᒪᕙᒃᑐᓄᑦ. ᑕᐅᑐᙳᐊᖅᑕᐅᓂᖓ ᓄᓇᕗᒻᒥᐅᑦ ᖃᐅᔨᒪᓂᖃᕐᓂᐊᕐᓂᖏᓐᓂ ᐊᒻᒪᓗ ᐊᔪᙱᓐᓂᐅᔪᓂ ᐊᑐᖃᑦᑕᕐᓂᕐᒧᑦ ᐃᒥᓗᐊᕌᓗᙱᓐᓂᕐᒧᑦ ᐊᒻᒪᓗ ᖁᕝᕙᖅᓴᐃᓗᑎᒃ ᑲᒪᑦᑎᐊᖅᑐᒥᒃ ᐊᒻᒪᓗ ᐊᑦᑕᓇᙱᓐᓂᖅᓴᐅᔪᒥᒃ ᐊᑐᕐᓂᕐᒥᑦ ᐃᒥᐊᓗᖕᒥᑦ ᓯᕗᓂᒃᓴᐅᔪᓄᑦ ᐃᓄᖕᓄᑦ.
ᑐᕌᒐᒃᓴᐃᑦ
ᐱᒻᒪᕆᐅᔪᖅ ᑐᕌᒐᒃᓴᐃᑦ ᐅᔾᔨᖅᓱᖅᑕᒥᒃ ᐸᕐᓇᒍᑎᒥᒃ ᐃᓚᖃᖅᐳᑦ:
- ᐊᖏᒡᓕᒋᐊᖅᑎᑦᑎᓂᕐᒥᑦ ᓄᓇᕗᒻᒥᐅᓂᒃ ᑐᑭᓯᐅᒪᓂᖓᓐᓂ ᑭᓱᑦ ᐊᑦᑕᓇᙱᓐᓂᖅᓴᐅᔪᓂ ᐊᒻᒪᓗ ᑲᒪᑦᑎᐊᕐᓗᓂ ᐃᒥᐊᓗᖕᒥ ᐊᑐᕐᓂᕐᒧᑦ ᑭᓲᓂᖓᓐᓂ.
- ᐊᖏᒡᓕᒋᐊᖅᑎᑦᑎᓂᕐᒥᑦ ᓄᓇᕗᒻᒥᐅᓂᒃ ᑐᑭᓯᐅᒪᓂᖓᓐᓂ ᐅᓗᕆᐊᓇᕈᑕᐅᔪᓂᒃ ᐃᓚᒋᔭᐅᔪᓂᒃ ᐃᒥᐊᓗᖕᒥ ᐃᒥᖃᑦᑕᕐᓂᕐᒧᑦ.
- ᓴᖅᑭᑎᑦᑎᓂᖅ ᐱᕕᒃᓴᖃᕐᓂᐅᔪᓂ ᓄᓇᕗᒻᒥᐅᑦ ᐃᒻᒥᖕᓄᑦ ᐃᑲᔪᖅᓱᐃᔪᓐᓇᕐᓂᖏᓐᓂ ᐃᒥᐊᓗᖕᒥ ᐊᑐᕐᓂᕐᒧᑦ ᐊᑦᑕᓇᙱᑦᑐᒥᑦ ᐊᒻᒪᓗ ᑲᒪᑦᑎᐊᕐᓗᑎᒃ ᐃᒥᕐᓂᐊᕌᖓᑕ ᐃᒥᐊᓗᖕᒥ, ᐊᒻᒪᓗ ᐱᐅᔪᒥᒃ ᒪᓕᒍᒥᓇᖅᑑᓗᑎᒃ ᐃᓚᒌᖏᓐᓄᑦ ᐊᒻᒪᓗ ᓄᓇᓕᖕᓄᑦ.
- ᑭᐅᓂᖅ ᓱᓕᖏᓐᓂᐅᔪᓂᒃ ᐃᒥᐊᓗᖕᒥ ᐊᑐᕐᓂᕐᓄᑦ ᐊᒻᒪᓗ ᖃᓄᖅ ᐊᒃᑐᐃᕙᖕᓂᖏᓐᓂ ᐃᓄᑐᐃᓐᓇᓂᑦ, ᐃᓚᒌᓂᑦ ᐊᒻᒪᓗ ᓄᓇᓕᖕᓂᑦ.
- ᑐᓂᓯᓂᕐᒥᒃ ᐃᑲᔪᓲᓂᒃ ᐱᓕᕆᔨᒻᒪᕆᐅᔪᓂᒃ, ᐃᒥᐊᓗᓕᕆᔨᒃᑯᓐᓂ ᑲᑎᒪᔨᕋᓛᖏᓐᓂᑦ, ᐊᒻᒪᓗ ᓄᓇᓕᖕᒥᐅᑕᓂᒃ ᐅᖃᐅᓯᒃᓴᓂᒃ ᐊᒻᒪ ᐱᓕᕆᔾᔪᑎᐅᔪᓂᒃ ᐱᔭᕆᐊᓕᖏᓐᓂ ᐃᑲᔪᖅᓱᐃᓂᕐᒧᑦ ᑲᒪᑦᑎᐊᖅᑐᒥᒃ ᐊᒻᒪᓗ ᐊᑦᑕᓇᙱᓐᓂᖅᓴᐅᔪᒥᒃ ᑐᕌᒐᐅᔪᒥᒃ ᐃᒥᐊᓗᖕᒧᑦ ᐊᑐᖅᑕᐅᓂᖓᓂ ᓄᓇᓕᖏᓐᓂᑦ.