Hunauyuq Imiqnik Ayuiqhaiyut Katimayiit?
Imiqnik Ayuiqhaiyut katimayiit (AEC) katimaqatigiinguyut nunallaaqmiut niruaqtauhimayut, munaqhivaktut aquiqtuanik nunallaarmingnut, ilihaivaghutiklu imittiarniqmik, parnaiyailaaqhutiklu nunallaaqnit ikayuutighanik ayuiqhavighaniklu. Havaaghaita AEC-kut taimaa ikighivaallirahuaqhugit imirlungnit-pilaqiyut amirnautit nunallaaqmiunut taimaa ihuaqtukkut inuuhiqattiarahuaqhutik ilihaiplutik qauhitivaallirahuaqhutiklu.
Qanuq AEC-kut ikayuqpakpat nunallaarnit?
Atia ilittuqhitiuyuq katimayiit, AEC-kut ilihailaaqtut nunallaaqmiunik imittiarniqmik amirnaqniillu ikighivaallirahuariamik talvuuna:
- Parnaiyaiplutik hulilukaaqtaghanik katimavighainiklu ilihaiyaamik nunallaaqmiunik imittiarniqmik amirnaqniiniklu imirlukpallaariamik
- Uqautjiyighanik makitapkaiplutik nunallaaqmiunut ayuqhautilingnik imirlukpallaarniqmit
- Ayuiqhaqviit ilittuqhitivalliaplugit imirlukpallaaqtailiniqmik
Havaaghainillu AEC-kut munaqhivaktut aquiqtuqtunik tuniqhainiqmiklu imirlungnik nunallaaqnit. AEC-kut havaaghaqalaaqtullu taimaa:
- Angiqhugit kitukiat imirlungnik qarritjiinnarialgit nunallaaqnut qaffiniklu tigumianginnarialgit
- Angiqhugit kitukiat imirluqalaaqtut, pihimalaaqtullu imirlungnik nunallaaqnit
- Angiqhugit kitukiat imirlungnik niuvilaaqtut
- Ihumaliuqhugit qanuq imirluit agyaqtaulaaqtut nunallaaqnut
Hunat nakurutauvat AEC-nguriamik?
Ilihaiyitut nunallaarnilu hivuliqtitut, AEC-kut katimayiit inuuhiqattiarumayunut nakuatut inuuhiqaqlutik ikayuinnarialgit nunallaaqnit ikayuqtainit. AEC-kut katimayiit ikayuqpaktut ihuaqhainahuaqhutik ayuqhautinik imirlungniqmit ilihaiplugit imirlungnik imittiarniqmik taimaalu, munarahuaqhugit naatjuhiit tuniqhaitjuhiillu imirlungnik nunallaaqnit. Akiliqtauvaktut katimaqatauyut AEC-kut Katimayiinit.
Qanuq katimayiulaaqqik AEC-kunni?
AEC-kut katimayiit niruaqtauvaktut katimayinut ukiuq tamaat. Niruaqtittivaktut AEC-kut niruaqtittigaangata nunallaaqmiunik taimaa inuit niruaqhiyumaaqtut atauhiiqlutik ukiuq tamaat.
Niruaqtauyumayut AEC-kunnut taimaittughat:
- Kanatamiutaulutik;
- 18-nik ukiuqarluni Niruaqvighaat Upluani;
- Nunavunmi nunaqaqhimayughaq atauhiugaluamik ukiumik Niruaqvighaat Upluani;
- Nunallaaqni nunaqaqhimayughaq talvani niruaqtauyumavianit.
Niruaqtauyumayut AEC-kunnut taimailaittut:
- Niruaqtittiyit havaktiat;
- Apiqhuiyiryuanguyuq apiqhuiyinit, kihimi talvani nunallaaqnit apiqhuiyiulaaqtut;
- Inuk taimaaqtitauhimayuq ihummaqlungniqmut;
- Inuk itiqtauhimayuq itiqtauvingnit;
- Inuk ihuinaaqhimayuq niruaqtittiyunit nanikiaq Kanatami ukiunit tallimanit hivuanit;
- Maligaliuqti Kavamatuqakkut Maligaliuqvianit Maligaliuqtinilu maligaliuqtiulaittuqlu.
Kinakiaq niruaqtauyumagumi titiraqtaunginnarialik talvuuna nunallaaqnit Niruaqtittiyit Havaktiat. Naunaittiariami katimayiuniqmik AEC-kut katimayiinit hivayaqlugu Kenny Bell talvani (867) 975-6816.
Qanurittunik ilihainiqmut pivighaqaqqat AEC-kut katimayiinut?
Qauyimagiaqaqtugut ilihaitjutighalik ikayuutiniklu makpiraaqnik AEC-ut katimayiinut parnaiyaitjutighait havagiamik nunallaarmingnit ilihaitjutighaliurutighallu. Pulaarutiplutiklu ilihaivaktut, ilihainiaqmiyut tuklianik Kangiqliniqmi, Hikutirvia 2019-mi. Pulaaqlugit taapkua naunaiqhitivut makpiraangit ilihaitjutit ahiniklu pivighanik nanihiyaamik.